lock search attention facebook home linkedin twittter

Verðbólguspá Capacent fyrir ágúst

Fjármálaráðgjöf Capacent spáir rúmlega 0,1% hækkun vísitölu neysluverðs í ágúst

Verðbólgan lúrir lævís og lúmsk
Ef að spá fjármálaráðgjafar Capacent um rúmlega 0,1% hækkun vísitölu neysluverðs (vnv) í ágúst gengur eftir mun verðbólgan á ársgrundvelli lækka úr 1,9% í 1,8%. Verðbólgan lúrir því enn vel undir verðbólgumarkmiði Seðlabankans.
Það sem fer upp hlýtur að koma aftur niður
Flugfargjöld tóku gríðarlegt stökk í síðasta mánuði og hækkuðu um 33% sem hækkaði vnv um 0,45%. Flugfargjöld sveiflast mjög eftir eftirspurn og árstíðum og var óvænt hækkun vnv í júlí ekki endilega til vitnis um að undirliggjandi verðbólga væri í miklum vexti. Í spá fjármálaráðgjafar er gert ráð fyrir að hækkun flugfargjalda í síðasta mánuði gangi að mestu til baka. Við gerum ráð fyrir um 17% lækkun flugfargjalda sem lækkar vnv um 0,28%. Samkvæmt könnun fjármálaráðgjafar var mikil lækkun á flugfargjöldum milli júlí og ágúst sem á ekki að koma á óvart í ljósi lækkandi olíuverðs og minnkandi eftirspurnar.
Olíuverð fellur eins og steinn
Heimsmarkaðsverð á olíu hefur lækkað um 22% frá lokum júní og er olíuverð nú um 13% lægra en að meðaltali í júlí. Á Íslandi hefur verð á díselolíu lækkað um 2,9% og verð á bensíni um 1,8% síðan í júlí. Fjármálaráðgjöf Capacent gerir ráð fyrir einni verðlækkun á eldsneyti til viðbótar og að eldsneytisliður lækki um tæplega 3% sem lækkar vnv um 0,11%.
Mjólkurverð hækkar
Verðlagsnefnd búvara samþykkti  3,58% hækkun á verði mjólkur og mjólkurafurða og 11,6% á smjöri. Þessar hækkanir hækka vnv um 0,1%.
Toppurinn að vera í teinóttu
Hinum árlegu sumarútsölum á fatnaði fer senn að ljúka en gert er ráð fyrir um 7,5% hækkun á fatnaði í mánuðinum sem veldur 0,35% hækkun á vísitölu neysluverðs.
Undirliggjandi eftirspurnarþrýstingur á fasteignamarkaði
Gert er ráð fyrir nokkurri hækkun á fasteignamarkaði en skv. könnun fjármálaráðgjafar var töluverður skortur á íbúðarhúsnæði um síðustu áramót sem kemur meðal annars fram í háu leiguverði. Þrátt fyrir miklar hækkanir á fasteignamarkaði virðist vera umtalsvert hagstæðara að kaupa en leigja. Gert er ráð fyrir að hækkun á fasteignalið leggi til um 0,11% til hækkunar vnv í ágúst.
Þótt útsölum á fatnaði séu að mestu lokið standa enn yfir útsölur á húsgögnum, heimilisbúnaði og raftækjum. Framangreindar útsölur leggja til um 0,03% til lækkunar vnv. Samtals spáir fjármálaráðgjöf Capacent því 0,14% hækkun vnv sem námundast að 0,1%.
Verðbólguspá fyrir ágúst 2015