lock search attention facebook home linkedin twittter

01 des 2015

Skulda­bréfayf­irlit Capacent

Nóvember - 4. vika

Verðbólguálag lækkar
Í kjölfar óvæntrar lækkunar á vísitölu neysluverðs í nóvember upp á 0,35% hefur verðbólguálag til 8 ára lækkað hratt og er nú 3,1% en var í hámarki fyrir viku síðan eða 3,54%.  Ávöxtunarkrafa óverðtryggðra ríkisbréfa hefur lækkað um 22 punkta að meðaltali á meðan ávöxtunarkrafa verðtryggðra íbúðabréfa hefur hækkað um 22 punkta að meðaltali.  Þannig hafa fjárfestar heldur létt á verðtryggðum stöðum og aukið stöðu sína lítillega í óverðtryggðum bréfum.  Gengi verðtryggðra bréfa lækkaði að meðaltali um 1,6% í síðustu viku en gengi óverðtryggðra hækkaði um 1,1%.

Feiti Lars
Þótt markaðurinn hafi oftast rétt fyrir sér var það þó ekki niðurstaðan nú. Hin óútreiknanlegu flugfargjöld útskýrðu helsta frávik í spá Capacent en þau lækkuðu í verði á meðan við spáðum lítilsháttar hækkun. Frávik vegna þess nam 0,25%. Lækkun á flugfargjöldum nú þýðir væntanlega enn meiri hækkun í desember.  Búast má við mikilli hækkun flugfargjalda í desember en verðmæling Hagstofunnar á verði til og frá landinu og innanlands er yfir hátíðardagana. 

Vísitalan án húsnæðis daðrar við verðhjöðnun
Það sem var þó áhugaverðara og útskýrði það sem eftir stóð af fráviki í spá, var að verð þjónustu lækkaði sem og sími, póstur, húsgögn og heimilisbúnaður.  Fyrri tveir liðirnir koma á óvart en Capacent hafði gert ráð fyrir hækkun á fyrri liðnum en verð á þjónustu er mjög tengt launaþróun, sömuleiðis er póstur og sími að stórum hluta þjónusta. Ekki ber því enn mikið á áhrifum kjarasamninga í verðmælingum. Einnig gæti verið að kaupmenn og framleiðendur hafi nýtt gengis­styrkingu krónu til að vinna á móti áhrifum launahækkana á verð. Bullandi verðhjöðnun hefur verið síðustu sex mánuði eða 1,1% ef horft er til vísitölu neysluverðs án húsnæðis.

HFF44 áhugaverðasti fjárfestingarkosturinn
Langtíma skuldabréf og þá sérstaklega verðtryggð virðast vera áhugaverðasti fjárfestingar­kosturinn nú.  Út frá verðtryggða framvirka vaxtaferlinum virðast hagstæðustu kaupin í HFF44 en krafan við lokun markaða á föstudag var 2,83% eða nærri sú sama og ávöxtunarkrafa HFF34. Rétt er þó að taka bréfið hægt inn, líklegt er að vnv hækki nokkuð í desember en hressileg lækkun gæti svo komið í janúar samfara janúarútsölum og lækkun virðisaukaskatts á fatnaði.
Skuldabréfayfirlit Capacent – Nóvember 4. vika

Author